PRAJASHILP digital
देगलूर : देगलूर उपजिल्हा शासकीय रुग्णालयात विविध विकासासाठी शासकिय निधीच्या व्यवहारात तब्बल ८९ लाख ७० हजार १५० रुपयांच्या कथित अपहाराचा धक्कादायक प्रकार समोर आला आहे. याप्रकरणी वैद्यकीय अधीक्षकांसह पाच कर्मचाऱ्यांविरुद्ध देगलूर पोलीस ठाण्यात गुन्हा दाखल झाल्याने आरोग्य विभागात एकच खळबळ उडाली आहे.
जिल्हा शल्य चिकित्सक डॉ. संजय माणिकराव पेरके यांनी दिलेल्या फिर्यादीवरून गुन्हा रजिस्टर क्रमांक ३५९/२०२६ अन्वये भारतीय न्याय संहिता २०२३ मधील कलम ३१८(२), ३१६ (५), ३३६ (२), ३३८ व ३(५) अंतर्गत गुन्हा दाखल करण्यात आला आहे. या प्रकरणाचा तपास पोलीस निरीक्षक सूर्यमोहन बोलमवाड हे करीत आहेत.
दरम्यान, देगलूर येथील शासकीय रुग्णालयातील सोयीसुविधा सर्वसामान्य रुग्णापर्यंत पोहोचविण्यासाठी वैद्यकीय अधीक्षक यांनी कठोर मेहनत घेतलेली आहे. याशिवाय रुग्णासोबत आणि रुग्णालयीन प्रशासनात त्यांची चांगली पकड असून या कथीत आरोपामुळे शहरात अचंबा व्यक्त होत आहे.
उपजिल्हा रुग्णालय देगलूरचे वैद्यकीय अधीक्षक डॉ. नरेश अंबादासराव देवणीकर, वरिष्ठ लिपिक रावसाहेब रामकिशन मोरे, प्रयोगशाळा सहायक दिगंबर आनंदराव मोरे, पुरुष अधिपरिचारिका शिवाजी मारोती पवार आणि कनिष्ठ लिपिक माधव किशन मगर यांनी संगनमत करून शासकीय निधीचा गैरवापर केल्याचा आरोप करण्यात आला आहे.
